International
Kitab bölmələri
Artıq 3 yaşını qeyd edən “Mücrü” komandası məncə nəşriyyat olaraq böyük işləri bacardı. Pandemiya dövründə kitab bazarına daxil olmaq, bir-birindən maraqlı layihələr həyata keçirmək, müxtəlif janrda saysız-hesabsız kitab nəşri, dərgilər, sənət portalı, rus dilində kitablar çap edəcək yeni nəşriyyat yaratmaq, beynəlxalq əməkdaşlıq, sərgilərdə iştirak və bəzilərindən xəbərsiz olduğum çoxlu və böyük uğurlar var. Bütün bu uğurlar “Mücrü”nün bir dünya markasına çevriləcəyindən xəbər verir. Mənim üçün doğma olan bu komandanın bütün uğurlarına qəlbən sevinirəm. Düşünürəm ki, bütün yönləri ilə “Mücrü” Azərbaycanın kitab bazarında brend olmağı, öz yerini tutmağı bacardı. “Mücrü”nün bütün kollektivini, oxucularını, yazarlarını, tərcüməçilərini, redaktorlarını, korrektorlarını və bütün zəhmətkeş əməkdaşlarını səmimi qəlbdən təbrik edirəm!
Bir qədər ənənəvi səslənsə də, mübaliğəsiz demək olar ki, “Mücrü” nəşriyyatı bu 3 ildə, az qala, 13 ilin işini görüb – bunu təkcə oxucu kimi yox, həm də kitabı bu nəşriyyatda nəşr olunmuş müəllif kimi də deyirəm. Bizim Xəzər Süleymanlı ilə birlikdə yazdığımız “Ayrılıqların təkrarı” romanını məhz “Mücrü”də çap etdirməyimiz düşünürəm ki, bu nəşriyyat barədə deyə biləcəyim fikirlərin ümumi mənzərəsini təsəvvür etməyə imkan verir. Müəllif öz mətnini hansı nəşriyyata etibar edirsə, demək, onun etibarlılığına, keyfiyyətli iş görməsinə əmindir. Bizdə də bu əminlik var idi və istər tərtibat, istərsə də dizayn, üz qabığı kimi məsələlərdə “Mücrü”nün gördüyü işdən nəinki biz, hətta oxucular da razı qaldılar. “Mücrü” nəşriyyatını zəngin, parlaq və uğurlu 3 il münasibətilə təbrik edir, kitablarının dünya stendlərində mütəmadi yer almasını və dövrün ən görkəmli qələm admaları ilə davamlı əməkdaşlıq etməsini arzulayıram.
Mücrü sözünün mənasını təbii ki, hamımız yaxşı bilirik. Kiçik bir qutu olsa da, içində çox dəyərli, nadir, qiymətli… əşyaları saxlaya bilir. Nəşriyyatın adının da təsadüfi seçilmədiyinə inanıram. Nəşriyyat adına xas işlərlə ölkəmizin kitab bazarında öz yerini, öz brendini yaratdı. Yarandığından üç il keçib. Üç il, bəlkə də qısa bir müddətdir, amma nəşriyyat çox vacib, əhəmiyyətli, xeyirli işlər görüb. Müxtəlif seriyada kitablar, ayrı-ayrı müəlliflərin əsərlərinin çapı, uşaqlar üçün nəzərdə tutulmuş rəngli kitab, jurnallar, dərsliklər, digər növdə çap məhsulları göz önündədir. Yəni nəşriyyat az müddətdə bir neçə istiqamətdə işlədi, uğurlu nəticələr aldı. “Mücrü” kitabın qədrini biləndi. Kitab sərgilərində “Mücrü”nün stendi həmişə oxucuları cəlb edir. Ona görə müəllif üçün də, oxucu üçün də bu nəşriyyat doğmadır. Başda dəyərli dostum Müşfiq XAN olmaqla doğma “Mücrü”nün kollektivini təbrik edirəm. İşlərində uğurlar arzulayıram. Arzu edirəm nəşriyyatın hər il yaşı artdıqca işi çoxalsın, nüfuzu böyüsün, əhatəsi, çevrəsi genişlənsin, şəbəkə kitab mağazalarına sahib olsun. Müəllifdən əsəri alıb kitaba çevirməyə imkanı olsun. Müəllifə qonorar verə biləcək qədər zənginləşsin. Beynəlxalq mükafatlara layiq görülsün. “Mücrü”, günün mübarək!
Gördüyünüz işlərlə rastlaşdıqca daha çox yaşınız olduğu təsəvvürə gəlir. Təbrik edirəm! Ümid edirəm, qarşıda daha böyük və gözəl işlərlə davam edəcəksiniz. Həqiqətən, gördüyünüz işlər təqdirəlayiqdir, “Mücrü” mənə doğmadır, hər bir uğuru üçün sevinirəm. Ölkəmizdə nəşriyyat sahəsində görməyi arzu etdiyim bir çox işlərə imza atacağınıza inanıram. Çətin, çox çətin işdir Azərbaycanda nəşriyyat qurmaq, naşir olmaq, əzminizi alqışlayıram! Yorulmayasınız! Çoxlu-çoxlu dəyərli kitablarla neçə belə illərə!
“Mücrü”nüz dolu olsun!
Kitabımızın çap olunduğu nəşriyyatlar bizə daha doğmadırlar. Necə ki biz bir torpaqda doğuluruq, deyirik bura bizim göz açdığımız yurddur, vətənimizdir. Kitablarımız da nəşriyyatlarda işıq üzü görür, kitabımızın dünya işığına çıxdığı nəşriyyatlar da kitabımızın vətəni olur. “Mücrü” bu mənada vətən nəşriyyatlardandır. Elə bu yaz “Mücrü”də ilk hekayələr kitabım işıq üzü gördü. “Mücrü” “Çarpayı cırıltısı” adlı ilk hekayələr kitabıma vətən oldu. Ancaq “Mücrü” mənimçün ən çox vaxtilə redaktoru olduğum “Mücrü” uşaq jurnalına görə daha doğma və əzizdir. Hər dəfə jurnalın yeni nömrəsi nəşrə hazırlananda uşaq kimi sevinirdim. Mənimlə birgə jurnalın nəşrini gözləyən xeyli sayda uşaq yazarı, balaca yazarlar və oxucular vardı. Hər nömrə sevinclə qarşılanır, əl üstündə tutulurdu. “Mücrü” jurnalının çapı nəinki uşaqların, uşaq yazarlarının, nəşriyyatın işçilərinin, Müşfiq müəllimin də sevinci, fərəhiydi. Təəssüflər olsun ki, maddi səbəblərdən biz jurnalın nəşrini üçüncü nömrədən sonra saxlamalı olduq.
“Mücrü” uşaq jurnalı ən çətin zamanlarda çap olunurdu. Elə nəşriyyat özü də həmin çətin günlərdə fəaliyyətə başlamışdı. Təsəvvür edin, nəşriyyat bir neçə aydır qurulub, pandemiya başladı. Ölkədə hamı bir-birinə dəyib, camaat evdən çıxa bilmir, icazəylə çıxır, işə gedən işinə gedə bilmir, adamlar toy edə bilmir, saçını vurdura bilmir. Biz uşaq jurnalı çıxarırıq. Həm də nəfis tərtibatla, gözəl dizaynla.
Nə az, nə çox… düz üç gözəl nömrəsi çıxdı “Mücrü” jurnalının. Elə bil göydən üç qırmızı, dadlı alma düşdü uşaqlar üçün. İnanıram ki, həmişəlik onların yadında da qaldı.
“Mücrü” jurnalını əlinə alan hər uşaq onu çox bəyənirdi. Hələ də hara getsəm, məndən o jurnalı xəbər alırlar. “Mücrü” nəşriyyatının adı çəkiləndə, o saat adamların ağlına uşaq jurnalı gəlir.
Arzulardıq ölkəmizdə insanların rifahı o qədər yüksəlsin ki, onlar uşaqlarına hər ay bir yox, onlarla jurnal alıb oxuda bilsinlər. Onların içində “Mücrü” jurnalı da olsun!
Müşfiq bəy deyirdi ki, nəşriyyatın adını eyniadlı məşhur bir televiziya filminin adından götürüb. O məşhur filmdə danışılır ki, müharibədə ərini itirən qadın uşaqlarını oxutmaq üçün mücrüsünün içindəki qiymətli əşyaların hamısını satır. Bəzək əşyaları satıldıqca onlarına yerini uşaqların alıb gətirdiyi diplomlar tutur. Həmin o ibrətamiz hekayətin mesajı bu gün həm də “Mücrü” nəşriyyatının mesajıdır. Kitaba, elmə, ədəbiyyata xərclədiyiniz pul heç vaxt itməyəcək! Bir gün daha qiymətli şəkildə özünüzə, mücrünüzə qayıdacaq!
Tanrı heç kimin əziyyətini itirməsin! Nə kitab çap eləyənlərin, nə oxuyanların!
Kitab çapıyla məşğul olanlar xalqını savadlı, elmli, aydınlıq içində görmək istəyənlərdir. Azərbaycanda deyərdim ki, fədakarlıq tələb edən işdir. Kitab oxuyanların da məqsədi elə eynidir.
Kitab yurdu, kitab vətəni “Mücrü” yə uzun-uzun ömür arzulayıram. Nəşriyyatın üç yaşı tamam olur, mübarək olsun!
“Mücrü” qoy həmişə kitabla dolu olsun! Sonra hər evə, hər ocağa kitablar paylasın! Hamının mücrüsündə də “Mücrü”nün payı olsun!
Uğurlar arzulayıram, Müşfiq müəllim. Otuz ilinizi qeyd edək!
“Mücrü” mənim önəm verdiyim gənc yayın evlərindəndir. Gənc olsa da, çox işlərə imza atıb. Bir sıra tanınmış və xüsusən də gənc yazıçıların kitablarının nəşri, tarixi mövzuda əsərlərin nəşri, ayrıca “Mücrü” dərgisinin və uşaq dərgisinin buraxılması bu qəbildəndir. “Mücrü” mənim yaradıcılığıma da xüsusi diqqət ayırıb. Üç illik fəaliyyəti dövrundə səhv etməsəm, səkkiz kitabımın nəşrinə imza atıb. Özu də yüksək poliqrafik tərzdə!
“Mucrü”nün rəhbəri, dostum, yazıçı Müşfiq bəyi, onun özü kimi gənc işçilərini ürəkdən təbrik edirəm! Yorulmayasınız!
Üç il bundan öncə çoxsaylı nəşriyyatlarımızın sırasına bir ad da əlavə olundu: “Mücrü”. Nəşriyyatın yaranması ilə fəaliyyətinin görünməsi çox qısa bir zaman çərçivəsində baş verdi. Elə nəşriyyatlar var ki, illərlə fəaliyyət göstərsələr də bu, kitab sənayesində o qədər də hiss olunmur. “Mücrü” yarandığı gündən bir sıra vacib sferaları əhatə etməyi bacardı. Dərs vəsaitləri, elmi-kütləvi nəşrlər, klassik və müasir dünya ədəbiyyatı və yerli yazıçılarımızın əsərləri. Bu qədər müxtəlif profilləri əhatə etmək o qədər də asan məsələ deyil. “Bir saatda tarix”, “Proza” seriyasından nəşr edilən kitablar təkcə milli mədəniyyətimiz və ədəbiyyatımızla məhdudlaşmır, həm də dünya mədəniyyətini və ədəbiyyatını qapsayır. Bu qədər işlərin öhdəsindən gəlmək üçün kitab işinə sonsuz və təmənnasız sevgi gərəkir. Əziz dostum, yazıçı, peşəkar naşir Müşfiq XANın fədakarlığı sayəsində “Mücrü” komandası bütün bunların öhdəsindən gələ bildi. Bütün bu işləri cəmi 3 il ərzində gerçəkləşdirməyi bacaran, kitab nəşrinə öz töhfələrini verən əziz və doğma “Mücrü”çüləri Müşfiq bəy başda olmaqla ürəkdən təbrik edir, yeni-yeni uğurlar arzulayıram! Hər kəsin öz mücrüsü var. “Mücrü” isə hamımızındır!
“Mücrü” nəşriyyatının yaranması Azərbaycan ədəbi-mədəni mühiti üçün olduqca sevindirici hadisə idi. Fəaliyyəti dövründə öz poliqrafik dəsti-xətti və nəşriyyat planlaması ilə seçilən nəşriyyat bu gün artıq yüzlərlə və bir-birindən maraqlı kitabı nəşr edib, maraqlı kitab layihələrinə imza atıb. Şadıq ki, “Mücrü” ilə biz də Azərbaycan Yazıçılar Birliyi olaraq əməkdaşlıq etmişik, “Yeni DƏB” kitab seriyasından 6 kitab üzərində “Mürcü” ilə bərabər işləmişik. İnanıram ki, bundan sonra da “Mücrü” ilə yollarımız kəsişəcək. Yenə bərabər işləyəcəyik. “Mücrü”nü, başda nəşriyyatın rəhbəri Müşfiq XANı olmaqla bütün fədakar, zəhmətkeş əməkdaşlarını 3 yaşı münasibətilə ürəkdən təbrik edirəm, yeni çeşidli nəşriyyat planı, bu planı icra etmək üçün güc, resurs, həmişəki yaradıcı və məsuliyyətli münasibət arzulayıram. İnanıram ki, “Mücrü” çağdaş kitab, kitabçılıq tariximizin dəyərli səhifələrini yazacaq. Çox yaşayın!
“Mücrü” nəşriyyatının 3 illiyini təbrik edirəm. Bu gün Azərbaycanda yeni nəsil naşirləri yetişir ki, bu sırada Müşfiq XAN parlamaqdadır. “Mücrü”nü qurdu və qısa müddətdə ciddi nəşriyyat kimi təsdiqlədi. Hələ də ölkədəki nəşriyyat-mətbəə dinastiyası sovetdənqalma metodlarla işləyir, müəllifi müəllif vəsaiti ilə çap edir. “Mücrü” isə əsl nəşriyyat kimi bütün yaxşı zənn etdiyi kitabları nəşriyyat hesabına çap edir, ətrafına istedadlı yazıçılar toplayır, maraqlı seriyalar üzə çıxarır. Təbriklər və uğurlar!
“Mücrü” Azərbaycanın zəhmətkeş nəşriyyatıdır. Bu zəhmətkeşlik onun rəhbəri Müşfiq XANdan gəlir. Gecə-gündüz demədən fasiləsiz fəaliyyət və illərin təcrübəsi ilə “Mücrü” çətinliklərə baxmayaraq, bu gün öz yoluna güclü şəkildə davam edir. Uğurlar arzu edir və 3 yaşlı “Mücrü”nü təbrik edirəm.
“Mücrü” 3 yaşına çatdı. Təbrik edirəm! Çörəyin kitabı üstələdiyi bizim zamanda ciddi kitabçılıqla məşğul olmaq əsl fədakarlıqdır.
“Mücrü” iki kitabımı nəşr edib. Hər ikisində kitab nəşr etməyin sonsuz həzzini yaşamışam. Müəllif, naşir, texniki redaktor, korrektor, dizayn və qrafika işlərinin bir-birilə bu qədər yaxın, hətta iç-içə olmasını, birinin digərini tamamlayaraq harmoniya yaratmasını bütün möhtəşəmliyi ilə mən ilk dəfə “Mücrü”də gördüm və kitabçılığın da yaradıcılığın çox ağır bir növü olmasına qəlbən inandım. İstedadlı yazıçı və naşir Müşfiq bəylə virtual söhbətlərim isə dostluğumuzun təməlinə dönüşdü. Tanrı lütfü ilə yeni kitabımı da “Mücrü”də nəşr etməyə hazırlaşıram.
Kollektivin hər bir üzvünü təbrik edir, onlara yeni-yeni uğurlar arzulayıram. Sağ olun, sağlam böyüyün!
“Mücrü” nəşriyyatı yaranışından bu günə qədər səviyyəli, keyfiyyətli, nəfis kitab nəşrləri ilə seçildi. Həm müəlliflərlə qurduğu iş birliyi, həm çap etdiklərinin təbliği, həm maarifləndirmə yolunda atdığı addımlar, gördüyü işlər təqdirəlayiqdir. Gənc yazarlara dəstəyi, tanınmışlara diqqəti, oxucularına hörməti xüsusi qeyd edilməlidir. “Mücrü” nəşriyyatına dəyər verən və onunla əməkdaşlıq edən, onun yaratdığı körpüdən keçən müəllif kimi, Müşfiq XAN başda olmaqla, nəşriytatın kollektivini təbrik edirəm. Hələ uzun illər bu yolda addımlasınlar, bizi və oxucularını sevindirsinlər. 3 yaşınız mübarək, əziz naşirlər.
“Mücrü”nü 3 yaşı münasibəti ilə ürəkdən təbrik edirəm. Ən vacibi odur ki, kollektiv peşəkar, zövqlü və işini sevən insanlardan ibarətdir. Burda tez-tez maraqlı və faydalı kitabların çap olunması haqqında xəbərlər oxuyuram. “Mücrü” mənə həm də ona görə əzizdir ki, “Şükriyyə” adlı kitabım burda işıq üzü görüb. Hər birinizə uğurlar arzu edirəm. Möhtəşəm işlə məşğulsunuz. Zəhmətiniz yerdə qalmasın. Gözəl işlərə imza atın ki, biz də sevinək və dəstəkləyək.
Mücrü Nəşriyyatının mənimçün ayrıca bir yeri var. Çünki həm onun təsisçisini təsisdən əvvəl tanıyıram, həm nəşriyyat gözümüzün qarşısında yaranıb, həm də, işə mənim kitabımla başlayıb. Yəni, bu nəşriyyatın ilk nəşri mənim şeirlər kitabım olub.
Məsələ belə oldu: Eşitdim ki, yazıçı, naşir dostumuz, çox hörmət etdiyim Müşfiq XAN öz nəşriyyatını yaradır. Onun işinə dəstək jesti kimi nəşrə hazır olan iki kitabımdan hansını istəsə, götürə biləcəyini xəbər verdim. Nəşriyyatın hazırlıq işləri başa çatan kimi Müşfiq bəy nəşrə mənim kitabımla start verdi. Bu baxımdan yəqin ki, həmişə də “Mücrü” mənimçün bir köynək yaxın nəşriyyat olaraq qalacaq.
“Mücrü”nün fəaliyyətinə gəlincə, deyim ki, o, bu məsələdə də fərqlənə bildi. Nəşriyyat qısa bir zamanda nəinki müxtəlif janrlarda və çeşiddə nəfis kitablar təqdim etdi oxuculara, “Mücrü” həm də müxtəlif vaxtlarda oxucuları bir yerə yığmağın fərqli formatını da gerçəkləşdirdi.
“Mücrü” bununla da kifayətlənməyib yazıçıların, şairlərin kitablarının nəşrinin yeni və münasib anlaşmalar yolunu axtardı, tapdı, tətbiq etdi. İndi “Mücrü” artıq ölkənin tanınmış nəşriyyatlarındandır.
Aradan çox az vaxt keçməsinə baxmayaraq, artıq əlimizə aldığımız kitabın naşir yarlığına baxıb “Mücrü” görəndə təəccüblənmirik. Çünki bu nəşriyyat hazırda ölkənin kitab istehsal edən qocaman müəssisələri arasında özünə yer edə bilib. Bu gün biz “Mücrü”nün məhsullarını ölkənin bütün kitab mağazalarında görə bilirik. “Mücrü” bütün kitab sərgilərində, yarmarkalarında parlaq təqdimatla, zəngin rəflərlə çıxış edir.
Heç şübhəsiz ki, qısa bir müddətdə belə uğur qazanılmasının əsas səbəbi Müşfiq XANın özünə inamı, hədəfə doğru qətiyyətlə addımlaması və yaratdığı, çiyin-çiyinə çalışdığı kollektivin əzmi, peşəkarlığıdır. Amma bu hələ başlanğıcdı. Məncə “Mücrü”nün əsas uğurları və daha parlaq dövrü hələ qarşıdadır…
Müşfiq XAN başda olmaqla Mücrünün bütün kollektivinə daha böyük nailiyyətlər arzulayıram! Qoy Azərbaycanın bu “Mücrü”sü hər açıldığında daha böyük qələm əhli ordusunu sevindirsin, daha çox oxucunun könlünü şad eləsin…
3 yaşın mübarək, “Mücrü”!
Mən son üç kitabım çap olunan “Mücrü”nü mənən özümün, “öz mücrüm” hesab edirəm. Çünki, o, “XAN”ın törəməsi, yetirməsidir. O nəşriyyat ki, orada il yarım müddətində, altmışadək müxtəlif mövzularda kitabların nəşrində, ərsəyə gəlməsində mən də çalışmışam, iştirak etmişəm və bu işdə, sahədə arxalana biləcəyim böyük qəlbli insanlar – dostlar qazanmışam. Həmin zamanlar müdirim olduğu üçün başqa mənada qarşılanar deyə, təntənəli məqamlarda Müşfiq bəy haqqında tərifli sözlər deməyə çəkinərdim. Amma, indi əminliklə deyirəm, onu tanıyan hər kəs təsdiq edər ki, tanıdığımız adamlar arasında halal ruzisi ilə yaşayan, həyat fəaliyyətində var qüvvəsi ilə cəmiyyətə fayda verməyə çalışan, barmaqla sayılası şəxslərdən biri də – tanınmış yazıçımız, sevdiyimiz nasir və naşir Müşfiq XANdır.
Əksəriyyətin asan və ya əyri yollarla çox qazanc əldə etmək istədikləri müasir dövranda kitab çapı kimi cüzi gəlirli bir işə ömrünü həsr etmək həqiqətən fədakarlıqdır. 3 yaşını qeyd edən “Mücrü”nün fədakar əməkdaşlarını ürəkdən təbrik edirəm! Arzu edirəm ki, “Mücrü” nəşriyyatı yaxın illərdə ölkədə kitab çapı üzrə kitabsevərlər arasında “brend”lərdən biri sayılsın. İnanıram ki, belə də olacaq!
Kitab ağır işdir; yazmaq da, oxumaq da, daşımaq da, nəşr etmək də. Üç ildə yüzlərlə kitaba imza atmış “Mücrü” bu ağır işin öhdəsindən layiqincə gəlir. Mənim “Oynamaq istəyən varmı?” pyeslər kitabım “Mücrü”də işıq üzü görüb. Yavaş-yavaş özünə uğurlu tale yazmaqdadır mənim yeddi gözəlim – yeddi pyes. Hesab edirəm, bu uğurda “Mücrü”nün də payı var – əli yüngül olub. Dəyərli “Mücrü”nün keşiyini çəkən səbirli, çalışqan, peşəkar əməkdaşlara uğurlar diləyirəm!
Kitab cəhalətin ən böyük düşmənidir. Kitab adına ən xırda iş görən adamlar ən yüksək hörmətə layiqdir. Naşirlərsə bəlkə də elə dünyanın ən müqəddəs işi ilə məşğuldurlar. Çünki, oxumaq dünyanın ən xeyirli vərdişidir. “Mücrü” nəşriyyatı bu vərdişi formalaşdırmaq üçün 3 il əvvəl “Hər kəsin kitabı olacaq”! devizi ilə yola çıxdı. 3 ildi insanlara oxumaq üçün şans, yazarlara sözlərini çatdırmaq üçün tribuna verir. Yaradıcı adamların arzularını reallaşdırır, ən sadə şərtlərlə, ən uyğun imkanlarla. “Mücrü”də gördüyüm ən böyük özəllik budur. Bir də onu yaradan insanlardakı zəhmətsevərlik və güclü iradə. Bax bu var olmağın ən böyük səbəbidir. “Mücrü” bəlkə də yazıçı-naşir Müşfiq XANın ən uğurlu əsəridir. Müşfiqin “Mücrü”sü ona görə hörmətə layiqdir ki, ən böyük istəkləri varlanmaq yox, maarifləndirməkdir. Kitab adına, oxumaq adına işlər görməkdir. Niyyəti təmiz olanın yoluna Günəş doğar. Yolunuz işıqlı olsun kitab adamlar! Boxçamıza qazandırdığınız kitablar üçün sonsuz təşəkkürlər.
Nəşriyyatlar bol olsun, artıb çoxalsın. Mən həmişə bunu arzulamışam. “Mücrü” də ilk çıxanda bu mənada sevinmişdim. Çünki hər yeni nəşriyyat dünyaya bir addım daha yaxınlaşmaqdır. Eyni zamanda bu ölkədə nəşriyyat açan insanlara böyük fədakarlar kimi baxıram. “Mücrü” də bu fədəkarlığın bir nümunəsidir. Ümid edirəm ki, bu fədakarlıq axırı öz bəhrəsini verəcək. Sizə ruhdan düşməməyi və dünyanı kitab kimi, mətn kimi görməyi arzulayıram.
“Mücrü’ nəşriyyatı yarandığı gündən ədəbi mühitin maddi imkanı ürəkaçan olmayan müəlliflərinin əsərlərini çap edən, onlara nəşr şansı yaradan dəyərli bir nəşriyyatdır. Az qala hər gün yeni kitablar çap edən “Mücrü’”dəyərli işlərə imza atır, Azərbaycan mədəniyyətinin və ədəbiyyatının təbliği yönündə çalışır. Mən fədakar insanlara, ədəbiyyat üçün çalışan “Mücrü”yə uzun ömür, səmərəli işlər görmək imkanları arzulayıram.
“Mücrü” nəşriyyatının 3 yaşını ürəkdən təbrik edirəm. Mən elə ilk vaxtlardan “Mücrü”nün həm adını, həm də nəşriyyat konsepsiyasını çox bəyənmişəm. İndi də uğurlarınıza çox sevinirəm. Fikrimcə, “Mücrü” yerli müəlliflərlə işləməyə və bədii ədəbiyyatın nəşrinə üstünlük verməlidir. “Mücrü”yə güvənirəm!
“Mücrü” Nəşriyyatı 3 illik fəaliyyəti ilə “Bizdə kitab oxuyan yoxdur” mifini dağıda bildi. Nəşriyyat düzgün nəşr strategiyası ilə qısa müddət ərzində oxucuların etibar etdiyi yayım evinə çevrildi.
Düşünürəm ki, “Bir saatda tarix” seriyası son illərin ən uğurlu kitab layihəsidir. Azərbaycan tarixində xüsusi yeri olan, ancaq unudulmağa üz tutan simaların modern təhkiyə dili ilə oxucuya çatdırılması ümumi kitabçılıq baxımından təqdirəlayiq konseptdir.
“Mücrü” Nəşriyyatı tarixi köklərin təbliği missiyası ilə yanaşı, müasir ədəbiyyata da öz töhfəsini verir. Gənc yazarlara dəstək kampaniyaları ilə ilk qələm nümunələri ilə oxucunu görüşdürür. Bu da gənc yazarlara stimul verir. Gələcək sağlam ədəbi mühitin formalaşması üçün bu vacib faktordur.
“Mücrü” nəşriyyatını 3 yaşı münasibətilə təbrik edir, burada çalışan ədəbiyyat cəngavərlərinin mücrüsündən çıxacaq yeni layihələri səbirsizliklə gözləyirik.
“Mücrü” nəşriyyatının bütün kollektivini, başda həmkarım Müşfiq XAN olmaqla, 3 yaş münasibətilə təbrik edirəm. Zənnimcə, üç illik qısa bir müddətdə nəşriyyat öz adını kifayət qədər geniş arealda eşitdirə bildi. Müəllif olaraq, “Mücrü” nəşriyyatı ilə əməkdaşlıqdan məmnunam. İnanıram ki, bu kollektiv gələcəkdə daha böyük işlərə imza atacaq, ədəbiyyatımıza daha dəyərli əsərlər bəxş edəcək. Təbriklər!